Di şahiyên daweta dotmîra Swêd de daweta kurdî jî hat nîşandan

Kurdan di rojên 6, 12 û 13-ê hezîranê de li Stockholmê daweta kurdî nîşandan. Wek tê zanîn bi boneya daweta keça qiralê Swêdê banû Viktoria`yê, Şaredariya bajarê Stockholmê gelek şahiyên pîrozbahiyê li dar dixe. Yek ji van jî mîhrîcana ”Love Wolks” (meşa evînê) bû, ku roja yekşemê xilas bû. Di vê m*ihrîcanê de heşt (8) komele (ji Swêd, Kurdistan; Japonya, Hindistan; Kuba; Senegal, Uganda û Perû) hatibûn hilbijartin ji bo ko nûnertiya hemû cîhanê bikin. KOMKAR-Swêd jî yek ji wan bû ku beşdarî şahiyên dawetê bû.

Van koman bi cil û bergên welatên xwe, bi musîk û govendên xwe yên neteweyî beşdarî festîvalê bûn.Komkar û Komciwan-Swêdê, li pênc deverên navendî yên cuda, şêweyê daweta kurdî nîşan dan û bi baldarî û begemkirineke mezin hatin pêşwazikirin. Di van rojan de, bûk û zavayekî bi kincên kurdî, bi musîk û govenda kurdî û tevî komeke govendê derketin pêşberî temaşevanan. Her carê, piştî ku hemû komeleyan lîstikên xwe nîşandan, wan bi hevra danseke hevbeş pêşkeş dikirin. Ciwanên kurd, bûk û zava û govendgerên kurd, bi cil û bergên xwe, bi muzîk û govenda xwe gelekî bala temaşevanan dikişandin ku ji her kesî zêdetir tezahurat û çepik werdigirtin.

Mihrîcana ”Love Wolks” (meşa evînê) ya dawetên cîhanê bi serfirazî encam da. Beşdarên kurd li vêderê bi dilekî xweş û serfiraziyeke mezin erkekî xwe bi cî anîn. Ji bo nasandina çanda gel û welatê xwe, karekekî gelekî hêja û delal bi cî anîn. Li her derê temaşevanên kurd pêşda dihatin ew hembêz û pîroz dikirin. Dilxweşiya wan ji ser çavê wan dihat xwendin.