HAK-PAR; “Dixwazin carek din Gelê Kurd û Tirk kaşê pêvajoyeke tarî bikin”

Dema Nû/Amed

Birêvabiriya Şaxê Amedê ya Partiya Maf û Azadiyan-HAK-PARê bi mebesta şermezarkirina operasyona li dijî endam û birêvabirên Partiya Demokrasî û Aşîtiyê-BDPê ku şaredar û parzvanên mafên mirovan jî di nav de ne, daxuyaniyek belav kir. HAK-PAR, di daxuyaniya xwe de de destnîşan dike ku hêzên statukoparêz dixwazin carek din Gelê Kurd û Tirk kaşê pêvajoyeke tarî bikin.

Daxuyaniya Şaxê Amedê ya HAK-PARê weha ye;

“Dixwazin carek din Gelê Kurd û Tirk kaşê pêvajoyeke tarî bikin. Ev rûdan û bûyerên ku di nav vê mehê de pêk hatine, bi şêweyeke zanyarî ji aliyê navendek ve tên kontrolkirin û dixwazin bi van bûyeran di nav herdû gelan de pêla alozî û tundiyê bilind bikin.

Pêvajoya ku bi bûyera li Amedê dest pêkir û bi bûyera li Reşadiye-Tokatê, provokasyonên li Îstenbolê, ya li navçeya Kopê ku bi kuştina mirovan bi encam bûn û herî dawî jî girtina DTPê û binçavkirin û girtina şaredar, endam û birêvabirên Partiya Demokrasî û Aşîtiyê yek ji bazinên vê zincirê ye. 

Operasyona li dijî siyasetmedarên kurd ku piştî girtina DTPê derbasê BDPê bûn, bazina herî dawî ya vê pêvajoyê ye. Di pêvajoya ‘rêlibervikirinê’ de pêkanîna operasyona binçavkirin û girtina ku saziyên legal yên siyaseta kurd û kesên ku bi dengê gel hatine bijartin, hêviyên guhertin û demokrasiyê berovajî kiriye. Ev rûdan jî carek din serwerbûna hêzên statukoperez dide nîşandan.

Em difikirin ku ev helwesta dudilî ya hikumetê ya li dijî rêxistina terorî ya Ergenekonê, bi van bûyerên dawî re ji nêzîk ve têkildar e. Ev bûyerên dawî jî dide nîşandan ku rêxistina Ergenekonê li ser kar e.

Li şûna ku hikumet xwe radestê hêzên dijberê guhertinê bike, divê di warê demokrasî û azadiyan de gavên bibiryar bavêje û bi lezgînî normên huqûqa navteweyî bipejrîne. Girtina gelek siyasetmedarên sivîl yên kurd ku hin şaredarên bajarê me jî di nav wan de ne û bi vê yekê siyaseta sivîl hedef hatiye girtin, wek Şaxê Amedê ya Hak-Parê em xistiye nav fikareyeke mezin û em vê yekê şermezar dikin. Em li bendê ne ku bi lezgînî dawî li van kiryaran bê anîn û herweha, banga me li rayedarên hikumetê ew e ku helwesteke bibiryar bişopînin.”