Kurdan li Danîmarqa bi pêxistina agirê Newrozê dest bi cejna kirin

Bi hatina cejna neteweyî, cejna Newrozê a 2008’an, duh li Danîmarqa li bajarê Kopenhagê li taxa Albertslundê kurdan bi amadekarîya Însîyatîfa Kurd li Danîmarqa (ÎKD) agirê Newrozê pêxistin û dest bi pîrozkirina cejna neteweyî a gelê kurd kirin. Kurdan bi xwendina sirûda neteweyî “Ey Reqîb” û sirûda Newrozê di bin ala Kurdistanê da agirê Newrozê pêxist û heta dawîyê jî li ber germa agirê Newrozê û li ber mûzika kurdî govend û dîlan kişandin.

Ji her çar perçên Kurdistanê kurd beşdarî agirê Newrozê bûn û bi vî rengî dest bi şahîya cejna neteweyî hat kirin. Agirê Newrozê di seat 17.00 da dest pê kir û heta derdora seat 21.00 berdewam kir.

Komela Adarê a Kurdên Sûrîyê cejna Newrozê pîroz kir.

Li hêla din di eynî rojê da jî Komela Adarê a Kurdên Sûrîyê (KAKS) li taxa Brøndby Strand’ê li nêzîkî bajarê Kopenhagê cejna neteweyî, cejna Newrozê pîroz kir. Şahîya Newrozê ji alîyê birêz Mahmud Berzencî va hat birêvebirin. Di destpêkê da yek deqe ji bo şehîdên Kurd û Kurdistanê har rawestandin û bi xwendina sîrûda “Ey Reqîb” dest bi bernameyê hat kirin. Li ser navê komelê peyamek hat xwendin, ku tê da li ser naveroka cejna Newrozê, berxwedana gelê kurd û kerêsatên ku di meha Adarê da wek karêsata Helebçe û 12.Adarê li Başûrê Rojavayê Kurdistanê hatine sere gelê kurd hat rawestandin.  

Ji alîyê hûnerî va jî bernameya şahîya Newrozê dewlemend bû û ev hûnermendên hêja ên wek hûnermend Silêman, Koma Armanc û Koma Kûlîlkên Efrînê bi deng û awazên xwe reng dan şahîyê û Newroza 2008’an xemilandin. Şahîya Newrozê ji seat 17.00 da dest pê kir û heta derengî şevê bi xwarin û vexwarin û govend û dîlana kurdî berdewam kir.

Di şahîyê da her malbatekê xwarinek kurdî bi xwe ra anîbû. Herwiha ji bo her zarokekê jî xelatek hat dayin û bê gûman vê yekê jî di roja cejna neteweyî da gelekî kêfa zarokan anî.

Wek gelik salan îsal jî di pîrozkirina cejna Newrozê da li Kurdistanê dijminê gelê kurd ji bo vê cejna neteweyî xwîna kurdan rijand û ew şehîd kirin. Di nîvê bernameya şahîya Newrozê da xebereke nexweş ji Başûrê Rojavayê Kurdistanê, ji bajarê Qamişlo gihişte destê mêvanan. Rejima xwînmij a Sûrîyê 3 xortên kurd şehîd kiribûn û 4 jî birîndar. Vê yekê bê gûman hemû mêvan kirin nava kûl û kederan û gelkî xemgîn kirin, lê wek hemû caran kurdan dîsan jî kiryarên dijmin mahkûm û protesto kirin, şehîdên xwe bibîranîn û li  cejna xwe a Newrozê xwedî derketin. Cejna Newrozê a 2008’an a ji alîyê KAKS va bi vî rengî hat lidarxistin û bi awayekî serkeftî bi dawî bû.

Newroza mezin a kurdan a ku ji alîyê Hêzên Sîyasî ên Kurd, HEVKARÎ û Însîyatîfa Kurd li Danîmarqa (ÎKD) va hatîye organîzekirin wê di roja 29.03.2008’an da bê lidarxistin.

Yilmaz YildizKopenhag

21.03.2008

Not: Ez cejna Newrozê a 2008’an, cejna berxwedan û tekoşîna azadîyê li hemi gelê kurd pîroz dikim.