Şahiya Newrozê li Stockholmê jî derbas bû…

(Nûçe-şiroveyek)

Haluk Öztürk

STOCKHOLM-28-03/2010- Bi hezaran kurdên Stockholmê û derdorê wê, wek her sal, îsal jî Newroza xwe bi şahî pîroz kirin. Şahiya Newrozê, ku ji alî Federasyona Komeleyên Kurdistan hat amadekirin, bi rawestina rêzgirtinê ji bo şehîdan destpê kir û bi xwendina gotarên siyasî û silavnameyên pîrozbahiyê dewam kir. Piştî gotara li ser navê Federasyonê ku ji alî seroka Federasyonê xanim Şermîn Bozarslanê ve hat xwendin, nûnerê Komîta Hevkarî ya Hêzên Siyasî Ata Baney û serokên du partiyên swêdî seroka Sosyal Demokratan birêz xanim Mona Sahlin û serokê Partiya Çep-dostekî gelê kurd yê qedirbilind- birêz Lars Ohly û nûnerên partiyên siyasî yên swêdî yên din gotar xwendin û piştgiriya xwe ji bo şerê azadiya gelê kurd nîşandan.

Seroka Partiya “Social Demokraterna” Mona Sahlin axaftina xwe bi xwendina helbesteke (*) Kemal Burkay dest pê kir. Wê dûra digel seroka rêxistina jinên Sosyal Demokratên Swêd  xanim Nalîn Pekgulê bi Kemal Burkay ra sohbeteke kurt kirin. Sahlînê û Burkay kêfxweşîya xwe ji bo vê hevdîtinê û hevdunaskirinê anîn zimên.

Ji bo şahiya Newrozê bernameyeke çandî ya dewlemend hatibû amadekirin. Komên govendê û  hunermendên muzîka kurdî ya gelêrî û ya ”nûjen-folklorîk” şahiyeke xweş pêşkêşî guhdaran û govendgeran kirin. Ji Kom-ciwanê çar (4) komên govendê yên ji temenên cuda (7-18 salî) rengekî xweş û delal dan şahiya Newrozê. Komeke govendê ya din jî, bi navê ”Helperkey Uppsala” ji bajarê Uppsalayê beşdarî bernameya Newrozê bûbû. ”Helperkey Uppsala” li ber muzîka reqsa kurmancî û hewremanî nimûneyên delaliyeke din ya kultura kurdan anîn ber çavan.

Hunermendên dengxweş Fatê, Aras û Îsmaîl Cuma şahiya Newrozê bi stran û awazên xweş dan derbaskirin. Meriv dikaribû li vêderê  kesên ku li ber stranên Fatê, dengekî xemgîn lê serbilind yê deşt û çiyayên welat, ji ber dilxweşî yan jî hestên xerîbî, hesret û bîranînan digirîyan bibîne; yan jî zarokên kurdan yên ku li Ewropayê hatine dinê û li vir têra xwe ji kultura kurdî para xwe standine, li ber muzîka Aras û Cuma bi coş direqisin bibîne. Heval û dostên salan yên ku di saya Newrozê de, salê carekê hevdu dibînin li salona pêşengeha pirtûkan dikevin sohbetê, vizeviza qelebalixa li ber maseyên pirtûk û CD-firoşan rengekî şahiya Newrozê yê hersalî ye li vir... Kurd dijîn; Newroz dijî, li dervayî welat jî…

Li Swêdê Federasyona Komeleyên Kurdistan, di jiyana civakî, siyasî û çandî ya kurdan de navendeke netewî ye. Ew kurdên ji her çar parçên Kurdistanê digihîne hev û wek sefareteke dîplomasî û çandî ya kurdan e li vî welatê Îskandinaviya. Spas ji Federasyona Kurdan re, spas ji hunermendan re û sipas ji Kom-ciwanê re ku ji bo angajekirina zarok û gencên me li jiyana kurdewerayê re û xurtkirina kesayetiya wan a netewî re dixebite…!

(*) Helbesta Burkay ya ku seroka Partiya Sosyaldemokratan xanim Mona Sahlinê xwend, ya bi navê ”Gula Sor” e, (bi swêdî ”Den röda blomman”). Em kurdiya vê helbestê li vir pêşkêşî we xwendevanên hêja jî bikin:

GULA SOR

Divê meriv av be, ba be
Delaliya herikînê bizan be
Ji bo bighê delaliya kar
Ked û xûdan be

Tov dizane tama rizînê
Berxwedan bi jiyan divê
Ji merivê nav şer bipirse
Hêvî û bextewariyê

Aşitî ku gula jiyanê ye, hêyf
Ji jan û êşan dertê
Ji bo azadiyê bedêl
Bo gula sor xwîn divê

(Ji pirtûka Berf Fedî dike. Swêdiya wê jî di pirtûka “Snön Skäms” de heye)